Welcome to The DEPOP Institute For Governance

Ստատուս Քվո 8

Բեռնել արձանագրությունը (PDF)

Գևորգ Մելիքյան

Սիրելի՛ ռադիոլսողներ, սկսում ենք «Ստատուս քվո» հաղորդաշարի հերթական թողարկումը: Ինչպես միշտ, Ձեզ հետ քաղաքագետ Գևորգ Մելիքյանն է: Ես ուզում եմ հիշեցնել մեր ռադիոլսողներին, որ մենք այս հաղորդումների շարքը իրականացնում ենք Շվեյցարիայի Համադաշնության կառավարության և «Դեպոպ» կառավարման ինստիտուտի հետ համատեղ: Նպատակն է, աջակցել Հայաստանում արդար և թափանցիկ ընտրությունների անցկացմանը, այդ ընտրություններին քաղաքացիների գիտակցված մասնակցությանը, ինչպես նաև՝ նպաստել Հայաստանում քաղաքացիական գիտակցության զարգացմանը՝ հնարավոր բոլոր միջոցներով: Այս նույն նպատակն է հետապնդում նաև Հանրային ռադիոն՝ իր բոլոր հարթակներով: Ես ուզում եմ հիշեցնել մեր ռադիոլսողներին, որ մենք նախորդ հաղորդումները նվիրեցինք մի շարք կարևոր հարցերի՝ ընտրակաշառք, ընտրակեղծարարություն, ընտրական գործընթացներում միջազգային կառույցների դերը և նշանակությունը, քաղաքական ուժերի ներկայացուցիչների հետ քննարկեցինք, թե ինչպես են իրենք մոտիվացնելու իրենց ընտրողներին, ինչպես նաև՝ թե ինչպես են իրենց վստահության քվեն ձեռք բերելու: Խոսեցինք նաև տնտեսական բաղադրիչի մասին:

Այսօր մենք մի քանի հյուր կունենանք և մեր այսօրվա առաջին հյուրն է «Կոնգրես-ՀԺԿ» դաշինքի պատգամավորության թեկնածու Արամ Մանուկյանը: Պարո՛ն Մանուկյան, ողջունում եմ Ձեզ: Մեր ռադիոլսողներին առաջարկում եմ լինել շատ ակտիվ, հարցեր ուղղել 55-37-02 հեռախոսահամարով:

Պարո՛ն Մանուկյան, արդեն ավարտին է մոտենում քարոզարշավը, վերջին փուլն է, մի քանի ժամ հետո կլինի լռության օր և այլևս հնարավորություն չի լինի քարոզարշավը շարունակելու: Ես կուզեյի հասկանալ՝ Դուք տարբեր մարզերով, գյուղերով, քաղաքներով անցել եք, ինչպիսի՞ն էր սկզբում Ձեր հնարավոր ընտրողը, ինչպիսի՞ն են հիմա իրենք, ի՞նչ փոփոխություն եք տեսնում և՛ իրավագիտակցության առումով, և՛ ուղերձների ընկալման առումով, և ընդանհրապես, փիլիսոփայությունը այս ընտրությունների: Դուք տեսնո՞ւմ եք ինչ- որ մի բան, որ փոխվել է:

Արամ Մանուկյան

Շնորհակալ եմ: Ես հենց հիմա գալիս եմ Աջափնյակից, այսօր առավոտյան ժամը 11-ից սկսած 500 տուն եմ մտել, 500 դուռ եմ թակել և սա արդեն երևի թե 4-րդ ընտրությունն է, որ այդ մեթոդն եմ կիրառում և միշտ եղել եմ ռեկորդակիր, ամենաշատն եմ դռնեդուռ արել, ամեն անգամ մոտավորապես 3000 դուռ եմ թակել, այս անգամ 1000-ից ավել չկարողացա, որովհետև ծանրաբեռնվածությունը մարզերի վրա էր, որովհետև խնդիր ունեինք գյուղեգյուղ պտտվելու, մոտ 3000 կիլոմետր, որպեսզի բացատրենք խաղաղության կոնցեպտը՝ ծրագիրը: Շատ դժվար էր: Դեկտեմբերի 17-ին, երբ մեկնարկեց այս գաղափարը, դժվարությունները ահավոր շատ էին: Վիրավորանք, անվանարկումներ, դավաճաններ… ինչ ասես եղավ, մենք համառորեն իմանալով, որ էդպես էլ լինելու է, 20 տարվա կարծրացած մտքի դեմ էինք դուրս եկել, և, բնականանաբար, էդպես էր լինելու և համբերատար, երկու-երեք խմբով գյուղեգյուղ անցանք, հանդիպեցինք, զրուցեցինք և դանդաղ, շատ դանդաղ, բայց աճը եղավ, և վերջին ակորդը, վերջին մի քանի օրվա ընթացքում կտրուկ աճ տեղի ունեցավ այդ գաղափարախոսության, այդ կոնցեպտի աջակիցների քանակի առումով, Տեր-Պետրոսյանի ելույթներն էին, և հատկապես «Ուրվագծի» վերջին հանդիպումը, որը միայն այդ օրը 100.000 մարդ էր դիտել, հետո կրկնությունները, youtube-ը և մնացածները չեմ ասում, շուրջ 200.000-ի կարգի դիտում է եղել, և դա որակ փոխեց: Ես այսօր, որ Ձեզ ասացի 500 դուռ եմ թակել, խնդրում եմ սա չընդունել քարոզ կամ գլուխգովանություն, ում հետ զրուցել եմ, 30-40 տոկոսը, միգուցե նաև դերասանություն են արել, միգուցե մի մասը ազնիվ չի եղել, բայց 30-40 տոկոսը իրենց աջակցությունն են հայտնել, և կողմ են եղել այդ գաղափարին: Այսինքն խաղաղության կոնցեպտը, գաղափարը աշխատեց, թեպետ ասեմ՝ որ մի 20 օր էլ լիներ, շատ ավելի լավ արդյունք կլիներ, մենք չհասցրեցինք պիկին, չհասցրեցինք:

Գևորգ Մելիքյան

Պարո՛ն Մանուկյան, արդեն վերցնե՞նք զանգերը: Մեր ռադիոլսողները շատ ակտիվ են:

Լսում ենք Ձեզ, Դուք եթերում եք, ներկայացեք խնդրեմ:

Ռադիոլսող

Բարի երեկո պարոն Մելիքյան, Ավետիսյան Անահիտ, Վաղարշապատ քաղաք: Պարո՛ն Մելիքյան, նախ մինչ կխոսեմ Արամ Մանուկյանի հետ, այս 30 օրվա ընթացքում ինչի մասին ասես, որ չխոսեցինք, հետո դեռ շատ ենք խոսելու, արդեն հետընտրականից, ուզում եմ իմ խորին շնորհակալությունը Ձեզ հայտնել, Արման Սաղաթելյանին, Հանրային ռադիոյին, անկեղծ ասած չեղավ մի պահ, որ ես Ձեզանից դժգոհեմ, ասեմ, որ անգամ մի կողմնակալ վերաբերմունք կա, կամ ինչ-որ մի այլ բան: Չեղավ էդպիսի բան: Պարո՛ն Մելիքյան, իսկ Ձեզ այնքան շատ եմ սիրում, հարգանքս շատ մեծ է, տա Աստված, որ շատ երկար Դուք լինեք Ձեր ունկնդիրների հետ: / Գևորգ Մելիքյան- Շնորհակալություն Տիկին Անահիտ: Հիմա գործնականին անցեք:/ Պարո՛ն Մանուկյան / Արամ Մանուկյան- հա՛ ջան))/ Ես Ձեզանից միայն մի պահի համար եմ շնորհակալ լինելու, որ 1991 թվականի սեպտեմբերի 21-ին ինքներդ կարդացիք տեքստը մեր անկախության: Շատ հիասթափված եմ, հարգելիս, Ձեր առաջնորդի պահվածքից, իր ազգուրաց ելույթից, իբր մենք այնքան բան ենք, հիմա էլ պետք է հանդուրժենք, թե Մինսկի խմբի համբերությունը հեսա հատնելու է, մեզ չգիտեմ ինչ փաստաթուղթ է ստորագրելու, Դուք էլ ամեն անգամ խաղաղություն-խաղաղություն ասելով անցկացրեցիք այս նախընտրական արշավը: Շատ դժգոհ եմ Ձեզանից պարո՛ն Մանուկյան, մի՛ նեղացեք, մի՛ վիրավորվեք, դա ասում եք,  որ շատ ձայներ հավաքեք, բայց քանի Դուք և Ձեր առաջնորդը, մի քիչ կոպիտ ասած, ներողություն եմ խնդրում, քանի Դուք էդ խելքին եք, դժվար էլ ինչ — որ բանի հասնեք: Շնորհակալություն:

Արամ Մանուկյան

Շատ լավ Տիկին Անահիտ, չեմ նեղանում բացարձակ, բայց նույն ձևով եմ ասում՝ քանի Դուք դեռ այդ խելքին եք, Հայաստանը 10 տարի հետո դատարկված կլինի, Դուք կարող է մնաք առանց թոռների, առանց երեխաների: Մենք գնացել ենք այդ ճանապարհին, իմանալով հանդերձ, որ լինելու են Ձեզ նման արձագանքներ, իհարկե: Մենք գիտենք, որ ռեյտինգ կարող է կորցնենք, մենք գիտենք, որ մեզ կարող են դավաճաններ համարել, բայց մենք Ձեզանից մի քիչ ավելի լավ գիտենք, թե ինչ վիճակ է Հայաստանում և եթե Հայաստանը այսօր համաձակ քայլերի չգնա, ապա ինչ է սպասվում: Ես Ձեզ մի թիվ ասեմ, ես կրթության մարդ եմ տիկի՛ն Անահիտ: Մեր երկրում 17 տարվա ընթացքում 270.000 աշակերտ դպրոցներում պակասել է, մի անգամ էլ կրկնեմ թիվը՝ 270.000 աշակերտ: Եվ մեզ հիմա մնացել ընդամենը 340.000 աշակերտ: Եթե առաջիկա 17 տարվա ընթացքում մենք ոչինչ չկարողանանք երկրում կտրուկ փոխել, ապա 17 տարի հետո Ձեր թոռները Հայաստանում դպրոց չեն կարող գնալ: Մենք եղած իրավիճակից է, որ էդպիսի առաջարկներ ենք ներկայացնում, և որպեսզի նաև միայն Ձեզ չպատասխանեմ, ես ուզում եմ արձանագրեմ Լևոն Տեր-Պետրոսյանի՝ Ձեր ասած այդ եռանախագահության հետ կապված, ընդամենը 1 օրվա ընթացքում տեղի ունեցած փաստերը: Մեկ օրվա ընթացքում՝ երեկվանից այս կողմ, եռանախագահությունը հայտարարություն է տարածել Ղարաբաղի հարցի շուրջ, իսկ եռանախագահություն նշանակում է՝ Ռուսաստան, Ամերիկա, Ֆրանիսա միասին, ԵԱՀԿ նախագահը հայտարարություն է տարածել այսօր, և Լավրովը մեծ ասուլիս է անցկացրել, և խոսել է հիմնականում Ապրիլի 2-ի դեպքերի մասին և Ղարաբաղի խնդրի շուրջ: Հետևայլն է իրավիճակը՝ եթե աշխարհի հզորները, համաձայնեցնելով մեր երկրի իշխանության և Ադրբեջանի իշխանության հետ, ուզում են խնդիրը լուծել, ես և Դուք եթե գումարվենք միասին և փորձենք դիմակայել, հակադրվել, ավելի վատ  կլինի քան այն, որ մենք գնանք այդ լուծմանը: Իսկ  լուծումը իր մեջ ունի շատ-շատ դրական բաներ՝ Ղարաբաղի ինքնորոշումը, որի մասին մենք երազել ենք, անկախությունը, սուվերենությունը այս ծրագրով լուծվում է, քայլ առաջ է գնում և մյուսը, որ շատ կարճ է, Դուք դեմ եք, որ Ղարաբաղը զորքերով, Ադրբեջանի ստորագրությամբ անջատվի Ադրբեջանից: Ո՞ր խելոք մարդը կասի, որ դեմ եմ սրան: Դուք մի քիչ ուղղակի կոմպլեքսավորվել եք, որ վատ է և դավաճանը… մի քիչ, որ ավելի սթափ նայեք, կարդաք, մի քիչ, որ իրավիճակը վերլուծեք, միգուցե կտեսնեք, որ մենք ճիշտ ենք անում: Ես համոզված եմ, որ մենք ճիշտ ենք անում, և միայն անկախության հռչակագիրը չէ, որ ես որպես լավ բան եմ արել, ես դրանից հետո էլ միշտ մեր երկրի համար միայն ու միայն լավ բաներ եմ արել: Շնորհակալություն:

Գևորգ Մելիքյան

Շնորհակալություն, վերցնենք հաջորդ զանգը, լսում ենք Ձեզ, Դուք եթերում եք:

Ռադիոլսող

Բարև Ձեզ, Արտակ Բաղրամյանն է, քաղաք Իջևանից: Հարցս հետևյալն է.

Պարո՛ն Մանուկյան, Աստծո հաջողությամբ ընդունենք, որ հանրապետականները այլևս մեծամասնություն չեն կազմելու այդ դեպքում գողացած 29-30 մլրդ. դոլլարից առնվազն քանի տոկոսը պիտի վերադարձվի պետական բյուջե, որպեսզի Դուք հրաժարվեք Ղարաբաղի խաղաղության ծրագրից: Շնորհակալություն:

Արամ Մանուկյան

Շնորհակալություն: Մենք միակ քաղաքական ուժն ենք, որ ասացինք՝ եկեք գողացած փողերը ետ վերադարձնենք, սկասած 1991 թվականից, այսինքն՝ մեր իշխանության ժամանակ ով գողություն է արել, թող այդ գումարները վերադարձնի բյուջե, դա միջազգային օրենք է, կոնվենցիա է, որի մասին խոսում եմ: Ոչ մի քաղաքական ուժ մեզ այդ գործում չաջակցեց, որ այդ կոնվենցիան հետադարձ ուժ ունենա և 1991 թվականից մինչև հիմա բոլոր գողացված գումարները վերադարձվեն բյուջե: Իսկ Ղարաբաղի հարցով, դա դրա հետ կապ չունի: Ղարաբաղի հարցի մեր մտահոգությունը հետևյալն է, որ եթե մենք այսօր չենք գնում այդ հարցի լուծմամբ, որը Հայաստանին լուրջ հաջողություններ է բերում և զարգացման, հզորացման, բանակ ուժեղացնելու հնարավորություն, ապա 5 տարի հետո ավելի դժվար է լինելու, 10 տարի հետո ավելի դժվար է լինելու և քանի որ եռանախագահությունը Ռուսաստանին շատ ավելի ակտիվ դերակատարում է տվել, Ռուսաստանը մեր տրածաշրջանում, ընդ որում Սիրայից մինչև Իսրայել, Թուրքիա այդ ամբողջ տարածաշրջանում շատ լուրջ դերակատարում ունի այսօր և եթե Ռուսաստանը Միացյալ Նահանգների, Ֆրանսիայի հետ համաձայնեցված նախաձեռնեն այս խնդրի լուծումը, Հայաստանը պետք է նախաձեռնող լինի: Հայաստանը եթե սպիտակներով խաղա, նախաձեռնող լինի, Ադրբեջանը մնալու է մենակ: Ահավասիկ մի հայտարարություն և շատ կարճ ավարտեմ. երեկ չէ առաջին օրը մեր հանրահավաքի ժամանակ ես հայտարարեցի, որ կտեսնեք, որ Ադրբեջանում սկսելու են նույնատիպ շարժում, Ադրբեջանում էլ կան քաղաքական գործիչներ, մարդիկ, հասարակ ժողովուրդ, որոնք ուզում են խաղաղություն, էնպես չի, որ Ալիևի հայտարարությունը դրանք Ադրբեջանի հայտարարություներն են: Թալիբովը երեկ հայտարարել է, որ եթե Հայաստանում կան քաղաքական ուժեր, որոնք գնում են, ապա դա պետք է ողջունել, և Ադրբեջանը նույնպես պետք է գնա խաղաղություն հաստատելու ճանապարհով: Ոչ մի ժողովրդի ձեռք չի տալիս պատերազմ, պատերազմը ձեռք է տալիս  իշխանություններին… սա հաշվի առեք: Շնորհակալ եմ;

Գևորգ Մելիքյան

Շնորհակալություն: Մենք ունենք զանգ, լսում ենք Ձեզ, Դուք եթերում եք:

Ռադիոլսող

Բարև Ձեզ պարո՛ն Մելիքյան, հարց ունեմ պարոն Մանուկյանին: Նա հիմնավորեց, որ Լևոն Տեր-Պետրոսյանի ելույթը շրջադարձային եղավ, իրենց համակիրների քանակը ավելացավ: Ի՞նչն էր խանգարում, որ օր առաջ ելույթ ունենար, եթե դա էր պատճառը:

Արամ Մանուկյան

Լավ, շնորհակալ եմ: Շատ ճիշտ եք ասում, 1997 թվականին է եղել լուծման առաջին իր ելույթը, եթե հիշում եք,  «Խաղաղություն, թե պատերազմ» մեծ հոդվածը, որից հետո եկան իշխանություններ, որոնք ասացին, որ Ղարաբաղում շատ ավելի մեծ հաջողություններ կունենան, շատ ավելի մեծ տարածքներ կբերեն և կլուծեն ինքնորոշման իրավունքը: Ցավոք սրտի, այդ ուժերը չկարողացան ոչ միայն իրենց ասածը պահել, այլ երկիրը գնաց անընդհատ թուլանալու ճանապարհով և այդ ժամանակից այս կողմ, Հայաստանի բնակչությունը կիսվել է: Այդ ժամանակ մենք ունեինք 3 մլն. բնակչություն, հիմա ունենք 1.8 մլն. բնակչություն, Ադրբեջանը ունի 9 մլն. բնակչություն, և նրանց ռազմական բյուջեն մեր բյուջեի չափ է, ցավոք սրտի: Եվ հիմա եկել է մի հատ կանգնելու ժամանակը, և Լևոն Տեր-Պետրոսյանի այս վերջին մեկ ամսվա ակտիվությունը, որը իմ իրավունքն է և ևս անվանում են «Լրջանալու պահը-2», սա ՍՕՍ է, սա մտահոգություն է, սա տագնապի ձայն է, Դուք այլ կերպ դա մի ընկալեք և եթե էդպիսի տագնապ է հնչել, ուրեմն դրա հիմքը կա: Բայց վերջին անգամ այս միտքը կրկնեմ, սա Հայաստանի զարգացման համար լավագույն միջոց է, եթե մենք գնանք այս ճանապարհով, միջազգային կառույցները մեզ աջակցելու են, չգնանք այս ճանապարհով, Ադրբեջանի նման հակադրվելու ենք ամբողջ միջազգային կառույցներին, որից մենք չենք շահի, իսկ այն դեպքում մենք ունենալու ենք զարգացած, հզոր բանակ, պաշտպանված Ղարաբաղ և զարգացող Հայաստան: Սա է այդ ծրագրի իրական դեմքը: Շնորհակալություն:

Գևորգ Մելիքյան

Պարո՛ն Մարուկյան, ես մի դիտարկում անեմ և վերցնենք զանգը: Զանգերը անթիվ են, արդյո՞ք ճիշտ է կապել այս ընտրարշավը միայն և միայն ԼՂ հակամարտության լուծման հետ, քանի որ տպավորություն էր, որ Դուք շեշտը դնում եք, դրա վրա միայն, բայց տպավորությունը էդպես է, որ ավելի երկրորդական, երրորդական եք համարում սոցիալական և այլ հարցերը:

Արամ Մանուկյան

Ոչ: Մենք ընդամենը ասում ենք՝ այս խնդրի լուծման դեպքում կարելի է թռիչքաձև զարգացումներ ունենալ, իսկ եթե ոչ, միշտ էլ պայքարել ենք կոռուպցիայի դեմ, մենաշնորհի դեմ, արտագաղթի դեմ: Տարբերությունը հետևյալն է՝ այս վիճակով էլ Հայաստանը կարող է զարգացում ունենալ, 5 տոկոս, 10 տոկոս, 15 տոկոս, բյուջե ավելանա և այլն, դա միշտ կարող է լինել: Մեր ասածի դեպքում, զարգացումը կարող է լինել 20, 40, 60 տոկոսով, որովհետև տոկոսային և տեմպերի առումով մենք հետ ենք մնում ռեգիոնի բոլոր երկրներից: Մեզ պետք է արագընթաց զարգացում:

Գևորգ Մելիքյան

Երկրորդ նախագահի խոսնակն էր  հակադարձել պարոն Տեր-Պետրոսյանին, որ երևի մոռացել եք, որ Քոչարյանի ժամանակ երկակի աճ էր: Աճը ավելի քիչ էր ՀՆԱ-ի:

Արամ Մանուկյան

Ես մի թիվ ասեմ: Մեր բյոջեն հիմա 0-ի վրա է, եթե մենք անգամ տարեկան 7 տոկոս աճ տանք, 12 տարի հետո մենք կարող ենք հասնել Ադրբեջանի սպառազինություններին: Այսինքն, այս ընթացքում մեզ պետք է արագընթաց զարգացում, ոչ թե 5-7 տոկոսանոց, այլ 25-27: Մենք ասում ենք, ոչ թե 7-ի մասին մտածենք, այլ 17-ի 27-ի, որովհետև փակ տարածքով 7 տոկոսից ավել չես կարող:

Գևորգ Մելիքյան

Վերցնենք այս զանգը, ես խնդրում եմ կարճ եղեք, լսում եմ Ձեզ. Դուք եթերում եք:

Ռադիոլսող

Բարև Ձեզ, ես Արամ Մանուկյանին հարց ունեմ: Պարո՛ն Մանուկյան, ես Ձեզ հարգում եմ, նույնն էլ Լևոն Տեր-Պետրոսյանին՝ որպես կիրթ մարդու, բայց արդյո՞ք Դուք վստահ եք, որ այդ 5 շրջանները հանձնելուց հետո Ադրբեջանը ավելի ագրեսիվ չի լինի Հայաստանի նկատմամբ, և Դուք ասում եք հայաթափվելը: Արդյո՞ք էդ 5 շրջանները տալիս էդ հայաթափությունը նորից հետ է գալու Հայաստան, ավելի շատ չի՞ լինի այդ հայաթափությունը:

Արամ Մանուկյան

Այդ 5 շրջանում, մարդ չի ապրում, սա մեկ: Այդ շրջաններում, որը Ադրբեջանի մասն են, այդտեղ կազմում են միջազգային զորքերը, և այդտեղ ոչ մի կրակոց չի լինում և այդ տարածքով Ղարաբաղը առանձնանում է: Այսինքն, Ղարաբաղը դրանով դառնում է ավելի ապահով: Հայաթափումը սրա հետ բացարձակ կապ չունի: Երկրորդ՝ Ադրբեջանը կգնա վատ քայլերի: Շատ էլ կուզի գնա, իհարկե կուզի, հիմա էլ կուզի, բայց երկու անգամ՝ 1994-ին և 1997-ին, մենք Ադրբեջանին ստիպել ենք գալ խաղաղության, ինքը չի ցանկացել, ինքը ստիպված է եղել: Եվ հիմա, դեռ մենք շանս ունենք, որ միջազգային կառույցների հետ համատեղ, մասնավորապես նաև Ռուսաստանի ջանքերի շնորհիվ Ադրբեջանին ստիպենք էդ Ձեր ասածը ստորագրի: Միջազգային պայմանագիրը որ ստրոգրվեց, Ադրբեջանի ստորագրությունը տակն է լինում. Ռուսների, ամերիկացիների, մեր և ադբեջանցիների: Եվ այս դեպքում, եթե ինքը կրակում է, օրինակ այսօր 60 անգամ գիշերը կրակել են Ղարաբաղի ուղղությամբ, մոտ 600 կրակոց, այս դեպքում ինքը ոչ թե Հայաստանին է կրակելու, եթե ստորագրում է այդ պայմանագիրը, այլ ռուսների և ամերիկացիների դեմ և եթե ադրբեջանը էդքան լկտի իրան պահի, որ դուրս գա այդ հզոր երկրների դեմ, թող փորձի, ով է ասում, թող փորձի տեսնենք էս դեպքում միջազգային կառույցները ոնց կվերաբերվեն նրան: Ձեզ հավատացնում եմ, չկա աշխարհում էնպիսի երկիր, որ դուրս գա բոլորի դեմ, չկա էդպիսի բան:

Գևորգ Մելիքյան

Մենք ունենք զանգ, վերցնենք այս զանգը, Դուք եթերում եք, լսում ենք Ձեզ, ներկայացեք խնդրեմ:

Ռադիոլսող

Իմ անունը Անդրանիկ է: Ճիշտ ասած՝ ես ուզում եմ ասել, որ պատգամավորների աշխատավարձը 760.000 դրամ է, եթե չեմ սխալվում, իսկ առաջին կարգի հաշմանդամի թոշակը՝ 19.000 է, և ոչ մի պատգամավոր այսքան ժամանակ չեմ տեսել, որ իր այդ 60.000-ից գոնե հրաժարվի, փոխանցի 1-ին կարգի հաշմանդամի, ասի՝ լավ, գոնե թող նա էլ մի քիչ ավել ստանա: Եվ դրանից հետո մենք պետք է նրանց ասածներին հավատանք, նրանց մարդկային, հայրենասիրական, ազգասիրական զգացմունքներին պետք է հավատանք, սա մեկ: Երկրորդն էլ ինչ վերաբերում է բանակին, Հայաստանը, որ 200 տարի կարողանա պաշտպանության բյուջեից ¼-րդը տրամադրել զենքի գնմանը, այդ ընթացքում էլ Ադրբեջանը ոչ մի գնում չկատարի, ապա 200 տարի է պետք, որ մենք հասնենք նրա գնած զենքի մակարդակին:

Արամ Մանուկյան

Շնորհակալություն, շատ կարճ պատասխանեմ:

Դուք ճիշտ եք առաջին մասով: 1000 դոլար յուրաքանչյուր պատգամավորի աշխատավարձն է, բայց ավելի այլանդակ բան կա: Այդ 1000 դոլար ստացողների մեջ կա 60 հոգի մարդ, որոնք միլիոնատեր են դոլարով, էնտեղ նստած են, և մարդ 15 տարի տարի այդնտեղ նստել է ու մի բառ չի խոսել: Այ, Դուք խոսեք նրանց մասին, ովքեր էս երկրի գողերն են, թալանչիներն են, դեռ պառլամենտում նստած են ու հետո կաշառք են բաժանում ժողովրդին, որ գնալու են նստեն, 5 տարի ոչինչ չանեն: Հաշմանդամների հետ կապված, հարգելի՛ս, մենք ասում ենք, եթե երկիրը պատերազմից դուրս չգա, ապա զինվորի համար 1000 դրամ հավաքելը խայտառակություն է, Ձեր 19.000 դրամը, թոշակների 40.000 դրամը: 1.200.000 աղքատ կա այս երկրում, 110.000 հաշմանդամ կա, մեր երկիրը եթե չգնաց այն ճանապարհով, որը մենք ասում ենք, 5 տարի հետո այդ 19.000 դրամն էլ չեք ստանալու, եղբա՛յրս: Հայաստանին հարկավոր է զարգացման հնարավորություն, խաղաղություն, սա է մեր զարգացման պլանը, և բոլորը պետք է աջակցեն սրան, այլ ճանապարհ չկա, սիրելի՛ս: Մեզ հաջողություն, Ձեզ հաջողություն, Ձեզ առողջություն, և վերջին իմ կոչը. Հարգելի՛ ընտրողներ, թեպետ փորձեցինք, որ ապրիլի 2-ը ընտրության օր չլինի, այլ հիշատակի օր պետք է լիներ, մեր 160 զոհերի հիշատակի օրը պետք է լիներ, բայց, ինչ արած, մնաց այդ օրը և եկեք մասնակցությամբ, մեր կոչով, մեր ոգևորությամբ, մեր փող չվերցնելով հարգենք այն տղերքի հիշատակը, որ ամսի երկուսին զոհվել են: Եկեք ընտրությունների և ինչ ուզում եք, արեք, բայց եկեք ընտրությունների և մասնակցեք Հայաստանի քաղաքական կյանքին: Շնորհակալություն, հաջողություն բոլորիդ:

Գևորգ Մելիքյան

Մենք ենք շնորհակալ, պարո՛ն Մանուկյան:

Ես ուզում եմ Ձեզ հիշեցնել, սիրելի՛ ռադիոլսողներ, որ մենք «Ստատուս քվո» հաղորդաշարի շրջանակում հյուրընկալում ենք տարբեր քաղաքական ուժերի, և այսօր հյուրընկալեցինք, ինչպես արդեն քննարկումից հասկացաք, «Կոնգրես-ՀԺԿ»  դաշինքի պատգամավորության թեկնածու Արամ Մանուկյանին: Ես ուզում եմ հիշեցնել նաև, որ մենք այս ծրագրերի շարքը իրականացնում ենք Շվեյցարիայի Համադաշնության կառավարության և «Դեպոպ» կառավարման ինստիտուտի հետ համատեղ, և նպատակն է, աջակցել Հայաստանում արդար և թափանցիկ ընտրությունների անցկացմանը, այդ ընտրություններին քաղաքացիների գիտակցված մասնակցությանը, ինչպես նաև փորձում ենք նպաստել Հայաստանում քաղաքացիական գիտակցության զարգացմանը՝ հնարավոր բոլոր միջոցներով: Այդ նպատակն է հետապնդում նաև Հանրային ռադիոն՝ իր բոլոր հարթակներով: Իսկ այժմ կհյուրընկալենք «Հայկական վերածնունդ» կուսակցության պատգամավորության թեկնածու Մհեր Շահգելդյանին, ինչպես նաև փաստաբան Նորայր Նորիկյանին: Խնդրում եմ ուշադիր եղեք, և հղեք Ձեր հարցերը 55-37-02 հեռախոսահամարով, քանի որ սա, ըստ էության, վերջին հաղորդումն է, որ հեռարձակվելու է ուղիղ եթերից, լռության օրվանից ժամեր առաջ:

Դե ինչ, շարունակում ենք մեր հաղորդումը, Ձեզ հետ Գևորգ Մելիքյանն է, մենք արդեն տաղավարում հյուրընկալում ենք «Հայկական վերածնունդ» կուսակցության պատգամավորության թեկնածու Մհեր Շահգելդյանին, պարո՛ն Շահգելդյան, ողջունում եմ Ձեզ  և փաստաբան Նորայր Նորիկյանին, պարո՛ն Նորիկյան, Ձեզ ևս ողջունում եմ:

Պարո՛ն Շահգելդյան, փորձենք հասկանալ, այս ընթացում Դուք վստահաբար ունեցաք հանդիպումներ և ընտրողների հետ տարբեր հանդիպումներում կարողացաք հասկանալ, թե ինչ տրամադրություններ կան: Այս ծրագրի նպատակն է, հիմնականում, այս օրերի ընթացքում փորձել մարդկանց տալ այն գիտակցությունը, որ գումար վերցնելով չի, որ աշխարհի վերջը չի, պետք է լինել ավելի հեռատես, պետք է լինել ավելի գիտակցված ամեն ինչում: Ես կուզեի հասկանալ, պարո՛ն Շահգելդյան, Դուք տեսնո՞ւմ եք այդ փոփոխությունը, Ձեր ընտրողի հետ Դուք ինչպե՞ս եք աշխատել այս օրերի ընթացքում:

Մհեր Շահգելդյան

Գիտե՞ք, երկու միտում կա իրականության մեջ, որը շատ հետաքրքիր է: Նախ և առաջ, բնականաբար, ընտրակաշառքների բաժանման և ֆինանսական այն աուկցիոնը, ցավոք սրտի, որ այսօր իրականություն է դառնում, երբ փորձ է կատարվում և հայտարարություն է արվում ավելի մեծ քանակի գումարներ տրամադրելու, գումար տալու ընտրակաշառք ըստ էության, սա ինքնըստինքյան բացասական երևույթ է, և ցավոք սրտի երբ սա փորձում ենք կոլերացնել Հայաստանում աղքատության շեմի բարձրացման, ինչպես նաև թերսնված ընտանիքների սնունդի հետ, նույնիսկ սննդի խնդիր ունեցող ընտանիքների քանակի ավելացման հետ, մենք հասկանում ենք, որ սրա համար, ցավո՛ք, սոցիալական բազա է ստեղծված: 30 տոկոսից ավել աղքատ են, ամեն 5 երեխայից մեկը թերսնվում է, Կոտայքում և Շիրակում 4 երեխայից մեկն է թերսնվում, Շիրակը, հասկանում եմ, աղետի գոտի է, բայց Կոտայքի մարզում ինչպե՞ս կարող է այդպես լինել, և այս իրավիճակում, մարդկանց մոտ այս հիմնախնդիրը կա, բնականաբար: Սա մի հիմնահարց էր, երկրորդը, սակայն, մենք տեսնում ենք, հետաքրքրություն՝ ծրագրերի նկատմամբ: Այնտեղ, որտեղ նախկինում առավել մեծ չափով նայում էին անձին, այսօր շատ հետաքրքիր է, որ ծրագրերն են ցանկանում, մարդիկ ուզում են հասկանալ՝ լավ, վերջիվերջո, ինչպե՞ս կարելի է փոփոխել: Դուք, ի՞նչ եք փոխելու, ի՞նչ են ստանալու, մարդիկ ուզում են ապագան տեսնել, արտագաղթը այսօր մեծ չափով պայմանավորված է ապագա չտեսնելով, մարդիկ ուզում են ապագա տեսնել հաճախ այն աղքատության, այն դժնդակ վիճակի, այն օլիգարխիզացիայի, մեր սոցիալական համակարգի բևեռացման պայմաններում և սրանք երկու տարբեր միտումներ էին, մեզ համար շատ կարևոր և շատ հետաքրքիր: Եվ մենք, նաև մեր մոտեցումների և մեր ելույթների մեջ ասում էինք, նախ և առաջ, իհարկե, բացասական երևույթ է, որովհետև ընդանհրապես ընտրակաշառքը արդեն իմ խորին համոզմամբ, դրա լայն տարածումը ազգային անվտանգության սպառնալիք կարող է դառնալ: Հասկանալի է, կուսակցություններն ունեն աշխատակիցներ,   ապարատ, սա մի խնդիր է, բայց զանգվածային այդ տարբերակով, սա իրապես աղքատ, փոքր բնակչություն ունեցող երկրում ազգային անվտանգությանը սպառնալիք է, նաև, ինչու չէ, դրսից:

Գևորգ Մելիքյան

Պարո՛ն Նորիկյան, մենք կանդրադառնանք իրավական կողմին, որովհետև ուզում եմ, որ որոշակի գնահատականներ հնչեցնեք, Ձեր դիտարկումները այս ընթացքում, մեկ հարց էլ ես պարոն Շահգելդյանի հետ փորձեմ հասկանալ: Պարո՛ն Շահգելդյան, Ձեզ հաճախ են ասում այն, որ չէ՞ որ Դուք կարող էիք փոխել՝ լինելով և՛ ԱԺ-ում, և՛ նաև կոալիցիայի մաս եք, կոնկրետ Դուք չէ, այսինքն՝ կուսակցությունը: Ես գիտեմ, որ սա շատ ծեծված հարց է, բայց կարծեք ինչքան էլ, որ բացատրում են… Նույնը վերաբերում է նաև, ենթադրենք, Դաշնակցությանը, նույն Բարգավաճ Հայաստանին, երբ հարց են հղում ասելով՝ դուք եղել եք անդամ, մաս եք կազմել, պատասխանատվություն եք կիսել, ինչո՞ւ այն ժամանակ չբարձրացրեցիք այդ հարցերը, իսկ հիմա ասում եք, որ նման խնդիրներ կան և այլևս հնարավոր չէ էսպես, պետք է փոխել: Ինչո՞ւ:

Մհեր Շահգելդյան

Ուրեմն, մի փոքր նաև ընտրակաշառքի հետ կապված՝ սիրով խոսեցինք մեր քաղաքացիների հետ: Քաղաքացիների հետ խոսելիս՝ մենք նրանց մի բան ենք ասում, ասում ենք՝ տեսե՛ք, եթե Դուք վաճառում եք Ձեր ձայնը, Դուք այդ ձայնի տերը չեք և հիմա ես ուզում եմ, որ մեր քաղաքացիներին ևս մեկ անգամ  ասել. երբ որ քաղաքացին ձայնը վաճառում է, տերը չէ: Գիտե՞ք, երբ Դուք գնում եք խանութ, և գնում եք մի շիշ Ջերմուկ, դա Ձեր սեփականությունն է, կթափեք, կկոտրեք, ոչ մեկի առաջ պատասխանատու չեք, ուրեմն եթե որևիցե մեկը գնեց քաղաքացու ձայնը, նա այդ քաղաքացու առաջ արդեն ոչ մի պատասխանատվություն չի կրում: Ես կոչ եմ անում մեր քաղաքացիներին, այս մոտեցմամբ ձայնդ վաճառեցիր, վերջ: Վաղը այդ մարդու դուռը թակելու ես, ասելու է՝ ի՞նչ է եղել, փողդ տվել եմ, ձայնդ առել եմ:

Գևորգ Մելիքյան

Պարո՛ն Շահգելդյան, բայց չկա՞ նաև հարց, երբ մարդիկ անվստահություն են ունենում նաև քաղաքական ուժերի նկատմամբ, իրենց համար արդեն միևնույնն է դառնում ամեն ինչ:

Մհեր Շահգելդյան

Գիտե՞ք, ինքը բարդ պրոցես է, սա ընտրողի հոգեբանությունն է, Դուք որպես գրագետ մարդ, ամբողջության մեջ տեսնում եք սա, այս երևույթը ունի տարբեր կողմեր, դա էլ, նա էլ, բայց վերջնական արդյունքն է կարևոր, և մենք խոսում ենք մեր համաքաղաքացիների հետ: Հիմա Ձեր հարցի պատասխանը. գիտե՞ք մեր ստացած քվեների շրջանակներում այն քվեները, որ մենք ունեցել ենք մշտապես, և մեր որոշումների վրա ազդեցության շրջանակներում մենք բազմաթիվ խնդիրներ լուծել ենք, մենք խոսել ենք նաև այդ մասին: Տեսեք, նախ և առաջ առաջին կոալիցիան. Աղետի գոտու վերականգման խնդիրը մեզ համար քաղաքական գերակայություն էր, և դա պայման էր՝ պետք է ավելի մեծացնի ֆինանսները, սկսվեց բավականաչափ մեծ պրոյեկտ: Ավանդների վերադարձը՝ երկար տարիներ մեզ մեղադրում էին պոպուլիզմի մեջ: Ավանդների վերադարձը նույնպես մեր հետևողական պայքարի հետևանք էր: Իհարկե, այլ քաղաքական ուժեր նույնպես այդ մասին սկսեցին խոսել, բայց առաջնայինը սա: Եվ սա սկսվեց, երբ մենք առաջին անգամ կոալիցիայի մեջ էինք: Նույնիսկ լինելով այդ կարգավիճակով՝ մենք միշտ բարձրաձայնել ենք բացասական երևույթների մասին, եթե Դուք արխիվով նայեք մեր բոլոր ելույթները, կտեսնեք: Մենք ժամանակին անընդհատ խոսում էինք այն վայրի սեփականաշնորհման դեմ, որ իրականացվում էր, անկախ նրանից, որտեղ էինք գտնվում, ընդդիմություն էինք, թե կոալիցիայի մեջ էինք, և մեր կոնֆլիկտների մեծ մասը դա էր, ասում էինք ինչո՞ւ համար եք սեփականաշնորհում ջրի գնով հասարակության սեփականությունը: Այնուհետև, մենք կարևորագույն խնդիները, որին հետամուտ էինք լինում, միշտ եղել ենք հետևողական՝ նույն ավանդները, նույն մանկապարտեզները, նույն ընտանեկան քաղաքականությունը, բայց գալիս է մի րոպե, երբ դու 5-6-7 մարդով չես կարողանում անցկացնել քո որոշումները: Մենք չենք ունեցել երբեք այնպիսի լիակատար իշխանություն, որպեսզի որոշման ընդունումը լիակատար մերը լինի, կամ մենք ունենանք որոշիչ ազդեցություն: Այս դեպքում, ահա երբ այս իրավիճակն էր, բնականաբար, քանի որ մեզ համար իշխանությունը երբեք չի եղել ինքնանպատակ, թողել, դուրս ենք եկել, և պայքարը շարունակել:

Գևորգ Մելիքյան

Մենք հիմա խոսքը տանք պարոն Նորիկյանին, իրավական տեսանկյունից ի՞նչ դիտարկումներ ունեք: Ես մեր ռադիոլսողներին առաջարկում եմ մի փոքր սպասեք, ինչպես պարոն Շահգելդյանն է ասում՝ հարցազրույցը ոչ թե իրենց և ռադիոլսողների միջև է, հիմա դեռևս մի փոքր հարցազրույցը իմ և մեր հյուրերի միջև կլինի, քանի որ այս մարդիկ պետք է պատասխանեն նաև մեզ հուզող հարցերին, այնուհետև Դուք ևս հնարավորություն կունենաք: Ի վերջո, կարծում եմ վերջին անգամը չէ, պարոնայք, որ այցելում եք մեզ, ընտրություններից հետո անպայման մենք Ձեզ սպասելու ենք մեծ սիրով:
Խնդրեմ, պարո՛ն Նորիկյան:

Նորայր Նորիկյան

Տեսեք, խնդիրը հետևյալն է. ակնհայտ է, որ ընտրակաշառքը քրեորեն պատժելի արարք է, և անկախ նրանից կաշառք տվողը թե ստացողը ենթակա են քրեական պատասխանատվության, այդպիսի իրավահարաբերության մեջ մտնելու համար, հետևաբար մենք պետք է իրականության զգացողությունը չկորցնենք, և դառնորեն արձանագրենք, որ առաջիկա ընտրություններում ընտրակաշառքը որպես երևույթ, իր որոշակի վճռորոշ դերն է կատարելու որոշ կուսակցությունների մոտ, իրենց համար ցանկալի արդյունք գրանցելու համար և որքան էլ որ հասարակության լրջամիտ հատվածը, մտավորականությունը, որոշ կուսակցություններ, որոշ քաղաքական գործիչներ կհայտարարեն, կցուցաբերեն համապատասխան սկզբունք, սկզբունքայնություն, կոչ անելով հասարակությանը, որ այսպիսի երևույթները խիստ բացասաբար են անդրադառնալու ընդանհրապես Հայաստանի ապագայի վրա, որպես երկիր, պետություն, հասարակություն, բայց մենք լուրջ մարդիկ ենք, մենք հասկանում ենք, որ այդ երևույթը ոչ միայն առկա է, և ես ցավով պետք է արձանագրեմ, որ մեր հասարակության որոշակի շրջանակ շատ ինտենսիվորեն սպասում է ապրիլի 2-ի առավոտյան, որովհետև շատ լավ հասկանալի է, որ այդ երևույթը, որպես բացասաբար վճռորոշ գործոն, իր առարկայորեն դրսևորումն է ստանալու հենց ընտրությունների օրը:

Գևորգ Մելիքյան

Պարոն Նորիկյան, մի բանով հակադարձեմ, եթե թույլ կտաք, ոչ թե իմ կողմից, այլ ընդանհրապես: Մարդիկ գիտե՞ք ինչպես են մտածում, ասում են՝ հետաքրքիր է, շատ շատերը, պաշտոնյաները, և այլն, վերցնում են գումարներ, իրենց համար տներ, դղյակներ են կառուցում, հենց գալիս է մեր հերթը, ասում են՝ գիտեք չի կարելի, հանկարծ չվերցնեք, դա շատ վատ է, քրեորեն պատժելի է, Դուք՝ Ձեր ապագան եք վաճառում, այսինքն, ամբողջ կուժն ու կուլան կոտրվում է այն խեղճ մարդկանց վրա, ովքեր 5000 դրամ են վերցնում:

Նորայր Նորիկյան

Շատ բարի, թույլ տվեք դրան շատ կտրուկ պատասխանել, մեկի սրիկայությունը չի արդարացնում մյուսի սրիկայությունը, և եթե այս կամ այն իքս պաշտոնյան կատարում է հանցագործությունը, հենց հասարակությանը տրված սահմանադրության ուժով այն մանդատը, որ ինքն է ձևավորել իշխանությունը, հասարակությունն էլ հենց այն ազդանշանը գնում է, որ եղբա՛յր, դու ինքդ պետք է ձևավորես քո իշխանությունը, որպեսզի վաղվա քո ընտրած իշխանությունից դու պահանջես: Եթե այդ իշխանավորի ձեռքը կգնա դղյակ կառուցելու համար անօրինական ճանապարհներով գումար հայթայթելու, այդ ձեռքը օրինական ճանապարհով կկտրվի, ոչ թե նրա համար, եթե այդ պաշտոնյան ձեռքը երկարացնում է, այդ անօրինական միջոցներով, էսպես ասած, դղյակը կառուցելու, հասարակություն կամ որևէ անհատ, դու ինքդ էլ մտածես, նախանձես նրան և դու ինքդ էլ սկսես գործադրել քո չափով: Ձեռքը կտրողը ժողովուրդն է, քանի ժողովուրդը դուրս չի եկել ու իրացրել Սահմանադրության 2-րդ հոդվածով ամրագրված իր իրավունքը, ձեռք        ը չի կտրել, հենց այդ իշխանություն ձևավորելու մանդատի ուժով, վստահեցնում եմ Ձեզ, մենք 5 տարին մեկ, այս տեղապտույտի մեջ, պարոն Շահգելդյանի ասած այդ 30 տոկոս կաշառք վերցնողի «քվեի» միջոցով, մենք լուրջ ազդեցություն ենք ունենալու իշխանության ձևավորման վրա, ինչը չի արտացոլելու վերջնահաշվարկում հասարակության իրական տրամադրությունները:

Մհեր Շահգելդյան

Պարո՛ն Շահգելդյան, ես մի հարց էլ Ձեզ ուղղեմ, և արդեն կպատասխանենք հեռախոսազանգերին: Իմ ընտրատեղամասը, որտեղ ես ընտրելու եմ Քանաքեռ-Զեյթունն է, և վերջերս ես ստացա Ձեր կուսակցության բուկլետներից մեկը: Երբ բացում եմ, ես տեսնում եմ, որ այդ անձի մոտ հիմնական շեշտված է, թե ինքն ինչ բարեգործություններ է արել: Ես ուզում եմ հասկանալ, արդյո՞ք սրանով պետք է ներկայանա պատգամավորության թեկնածուն, թե ինքն ինչքան լավ բաներ է արել այս կամ այն հարցում: Սա՞ է պատգամավորության համար անհրաժեշտ նախապայմանը:

Մհեր Շահգելդյան

Իհարկե, պատգամավորության համար անհրաժեշտ նախապայմանը դա չէ, ես չգիտեմ, թե ում մասին եք Դուք ասում, բայց, իհարկե, պատգամավորության թեկնածուի նախընտրական բուկլետը պետք է արտացոլի նրա այն հատկանիշները և այն մոտեցումները, որ նա պետք է իրացնի խորհրդարանում: Շատ լավ, եթե մարդը բարեգործ է, թող բարեգործությամբ զբաղվի: Մի խոսք կա, որ բարեգործություն անելու դեպքում, գովազդելու անհրաժեշտությունը չկա, բարեգործությունը հոգու պահանջ է, եթե մարդը հավատացյալ է, Աստծուն է հավատում, դա պատվիրան է, կարո՞ղ ես՝ օգնիր մերձավորիդ… սա է բարեգործության խնդիրը: Բնականաբար, պատգամավորության թեկնածուն պետք է ունենա այլ հատկանիշներ, և  կարևորագույն խնդիրը օրինաստեղծ գործունեությունն է, կարևորագույն խնդիրը՝ լինել այն խողովակը, որ պրոբլեմները գան ԱԺ և հրապարակային բարձրաձայնվի: Այլ խնդիր է, որ պատգամավորության թեկնածուն պետք է կարողանա աշխատել հասարակական կազմակերպությունների հետ, նրանց առաջարկությունները դարձնելու օրենսդրական նախաձեռնություններ: Եվ ամենակարևոր խնդիրներից մեկը Հայաստանի համար խիստ կարևոր է՝ հաշվի առնելով Արցախի հիմնախնդիրը, սա խորհրդարանական դիվանագիտությունն է՝ կարող է մարդը, թեկուզ և ոչ բոլորը, սակայն միջազգային կառույցներում ոչ միայն ելույթ ունենալ, ներկայացնել դիրքորոշումներ, այլև կարողանալ ազդել գործընկերների վրա, որպեսզի վերջիններիս որոշումները լինեն հայանպաստ: Այս կամ այն խորհրդարանական վեհաժողովներում, այս կամ այն երկներում գործընկեր կուսակցությունների շրջանակներում, ասենք, մեր կուսակցությունը Եվրոպական ժողովրդական կուսակցության անդամ է, մենք նաև համաշխարհային դեմոկրատ կենտրոնամետների կազմակերպության անդամ ենք, որի մեջ մտնում են քրիստոնյա- դեմոկրատական և ժողովրդական կուսակցությունները և անդամ ենք արդեն 10 տարուց ավելի: Էստեղ էլ է պետք աշխատել, սա ևս մեկ հատկանիշ է, որը անհրաժեշտ է, որը կարևոր է, բոլորի նկատմամբ հարգանք ունեմ, բայց, ցավոք սրտի, վիճակագրությունը ցույց է տվել, որ 55 տոկոսից ավելին մեր ԱԺ պատգամավորների, չեն խոսել և չեն առաջարկել օրենսդրական նախաձեռնություններ:

Գևորգ Մելիքյան

Մենք ունենք զանգ, մեր ռադիոլսողները անհամբեր սպասում են իրենց հարցերը ուղղելուն, նաև ես ռադիոլսողներին առաջարկում եմ, երբ մարդիկ քննարկում են անում, ինչ- որ հարցերի են պատասխանում, հնարավոր չէ ուղղակի ընդհատել և միանգամից անցնել հարցին: Պետք է մարդն իր միտքը ավարտի, խնդրում եմ ներողամիտ եղեք և նաև այս քննարկման մշակույթը եկեք մեզ մոտ կիրառենք: Լսում ենք Ձեզ, Դուք եթերում եք:

Ռադիոլսող

Բարև Ձեզ, ես երկու հարց ունեմ պարոն Շահգելդյանին: Ես Ձեզ շատ հավանում եմ, որովհետև շատ գիտակից եք, անգամ Ձեր պատգամավորները չեն կարող ընտրել մեկին, ձեզ մոտ,  որ անվավեր են ճանաչում, հայերեն չգիտեն: Հիմա Դուք հաշվում եք, որ սա ամենաարդար ընտրությունն է՞ / Մհեր Շահգելդյան- Իհարկե, ոչ/ Իհարկե, ոչ, ապրես: Հիմա գալիս են դուռը ծեծում են, ասում են ո՞ւմ ես ընտրում: Քե՞զ ինչ՝ ես ում կընտրեմ, վերցրու էս 10.000-ը, քո տվյալները տուր: Բակում էլ են խոսում, որ արդեն 20.000 ա դարձել, 20.000-ը վերցրուք ու ձեր տվյալները տվեք: Հիմա ուզում եմ հարցնել, եթե տվյալները տալիս են, 20 000-ը վերցնում, ո՞նց են ընտրում իրենք, ասում են՝ կարմիր լույսը վառվում է…

Մհեր Շահգելդյան

Տեսեք, կարևորագույն հարց եք բարձրացնում, և շատ շնորհակալ եմ հարցի համար, իհարկե, շնորհակալ եմ նաև բարիացակամ խոսքերի համար, որովհետև հրապարակային քաղաքական գործչի համար քաղաքացու դրական կարծիքից ավելի թանկ ոչինչ չկա, իրականությունը էդպես է, սա նաև ես համարում եմ իմ սոցիալական կապիտալը: Հիմա, այն ինչ Դուք ասում եք: Գալիս են առաջարկում են գումար, հետո ասում են, գիտե՞ք ինչ, մենք կտեսնենք, Դուք պետք է քվեարկեք, մարդուն գցում են թակարդ, հետո ասում են՝ մենք կտեսնենք, այնտեղ տեսախցիկները դրված են, Դուք ինչպես քվեարկեցիք, գրիչի վրա… Այս ամեն ինչը ուղղակի հերյուրանք է, տեսախցիկները հանձնաժողովներում դրված են նրա համար, որպեսզի հանձնաժողովի անդամը չմտածի հանկարծ կեղծիք անելու մասին, որովհետև հիմա էսպես է, ցանկացած մարդ, ինտերնետի միջոցով կարող է հանձնաժողովի միջոցով տեսնել ինչ է կատարվում, սա ավելի թափանցիկ է դարձնում: Կամ ասում են, եթե մատնահետքը դրել ես, ուրեմն ես կիմանամ, որ դու… Սա բացարձակ անհեթեթություն և հերյուրանք է, այնպես որ ոչ-ոք չի կարող վերահսկել Ձեր և որևէ մեկի քվեարկությունը, դրա համար, երբ գալիս են, գումար են առաջարկում, հետո հանկարծ մարդը վերցնում է, և ընկնում է թակարդի մեջ, և ասում են՝ եթե չքվեարկես, մենք կիմանանք, որ այդպես չէ, սա բացարձակ հերյուրանք է: Իհարկե, գերադասելի է գումար չվերցնել, բայց եթե որևիցէ մեկն էլ վերցնում է, չնայած մեր իրավաբան գործընկերը խոսեց քրեական պատասխանատվության մասին, բայց եթե նույնիսկ մարդիկ աղքատությունից դրդված վերցնում են, նրանք պետք է հասկանան մի բան, իրենց ոչ-ոք չի կարող հանձնաժողովում վերահսկել, իրենք լրիվ ազատ են և լրիվ գաղտնի են:

Գևորգ Մելիքյան

Շնորհակալություն, պարո՛ն Շահգելդյան, ես կառաջարկեմ մի փոքր կարճ լինել, որպեսզի մենք մեկ -երկու զանգ էլ վերցնենք: Պարոն Նորիկյան, Ձեր արձագանքը, կարծում եմ սա նաև Ձեր մասով է կարևոր:

Նորայր Նորիկյան

Ես ընդանհրապես սկզբունքորեն դեմ եմ անգամ էդ վերցնելու գաղափարին, վերցնել, բայց գնալ ուրիշին ընտրել: Դա կարծում եմ նույնպես քրեորեն պատժելի արարք է,  հետևաբար պետք է նաև մեր հասարակությանը հորդորել,  նաև ներողություն եմ խնդրում բառիս համար, դաստիարակել այդ շերտին, որ ընդհանրապես ընտրակաշառք վերցնելը քրեորեն հետապնդելի արարք է: Ինչ  վերաբերում է մնացած դիրքորոշումներին, ես ամբողջությամբ համաձայն եմ պարոն Շահգելդյանի արտահայտած մտքերի հետ, որ որևէ ձևով ընտրական քվեարկության պրոցեսը վերահսկելի չի այլ սուբյեկտների կողմից, հետևաբար մեր քաղաքացիները որևէ ձևով կաշկանդված չեն քվեախցիկում իրենց խղճի մտոք ընտրելու: Հետևաբար, կհորդորեմ մեր քաղաքացիներին՝ տուրք չտալ այդիպիսի վախերին, զգուշացումներին, և անկախ այլոց կողմնորոշումներից, իրենց քաղաքացիական պարտքը ընտրախցիկում կատարելիս առաջնորդվեն բացառապես սեփական խղճով, վստահ լինելով, որ իրենց ոչ-ոք չի նկարում, իրենց նկատմամբ որևէ մեկը վերահսկողություն չի կարող իրականացնել: Եվ մի կարևոր բան, խնդրում եմ գաղտնիության սկզբունք գոյություն ունի ընտրական օրենսգրքով և Ձեր գաղտնիության սկզբունքը նաև քրեորեն պատժելի արարք է, և ոչ-ոք չի կարող խախտել, Ձեզ ստիպել, որ Դուք հայտարարեք, թե ում եք ընտրել:

Գևորգ Մելիքյան

Քանի որ սա մեր վերջին հաղորդումն է ըստ էության լռության օրվանից առաջ, լավ է, որ նման հորդորներով ավարտենք, փաստացի մարդկանց նաև վերջին անգամ հիշեցնենք, որ իրենք են իրենց քվեի տերը, և որևէ մեկը չի կարող իրենցից այն վերցնել: Մենք կրկին զանգ ունենք, լսում ենք Ձեզ, Դուք եթերում եք:

Ռադիոլսող

Բարև Ձեզ: Իմ հարցը ուղղում եմ Արթուր Բաղդասարյանի կուսակցության անդամին, որի անունը դարձրեց Վերածնունդ: Մենք շատ լավ հիշում ենք թե ինչպես, երբ Արթուր Բաղդասարյանը դարձավ անվտանգության խորհրդի նախագահ, տեղի ունեցան մարտի 1-ի դեպքերը: Նա էդպես  որ շատ փայլուն ճառեր է ասում, լավ խոսում է, ո՞վ չի ճանաչում նրան: Խոսում է խնայողությունների, վերադարձի մասին, երբ գնում ենք բանկ ասում են՝ 1931 թվականի ծնվածներից առաջները, այսինքն 87 տարեկանից հետո միայն կարող են վերադարձնել, կամ այդ Աճառյան դպրոցը, որ ասում են ինքն է քանդել և դարձրել ինչ-որ ակադեմիա: Այդ բոլորի մասին, մենք բոլորս շատ լավ գիտենք, և թե որ փողերով է ինքն այսօր ուզում դառնալ պատգամավո՞ր:

Գևորգ Մելիքյան

Լավ, շնորհակալություն: Պարո՛ն Շահգելդյան:

Մհեր Շահգելդյան

Ես պատասխանեմ մի քանի հարցերի, նախ և առաջ բացարձակ հերյուրանք է մատի 1-ի և ԱԽՔ-ի համադրությունը, սա տեղ չունեցող խնդիր է միանշանակորեն, և ես չեմ էլ անդրադառնում այս հիմնահարցին: Երկրորդ խնդիրը, որ տիկինը խոսում է ավանդների վերաբերյալ, որ վերադարձնում են 1937 թվականի ծնվածներին, նախ միայն նրանց չեն վերադարձնում, այլ այն անձնանց, որոնք գտնվում են «Փարոս»-ում, վերադարձրել են արդեն պատերազմի վետերաններին, ազատամարտի վետերաններին, և տեսեք 41 միլիոն դոլարի շրջանակներում արդեն իսկ վերադարձվել է: Եթե «Օրինաց Երկիր» կուսակցության և Արթուր Բաղդասարյանի հետևողական պայքարը չլիներ, ինչ է, վերադարձվելո՞ւ էին ավանդները: Պրոցեսը չէր սկսվելու և սա, ես կարծում եմ, անհրաժեշտ է օբյեկտիվ լինել, և եթե այո, «Հայկական Վերածնունդ»-ը հավաքեց ձայներ բավականաչափ, եթե մենք հաղթեցինք, մենք շարունակելու ենք ավանդների վերադարձման խնդիրը, ընդհուպ մինչև նաև ժառանգորդները: Սա միանշանակ է, ինչ վերաբերում  է մյուս հարցին, ուրեմն Արթուր Բաղդասարյանի գլխավորությամբ այսօր Հայաստանում ստեղծվել է Ֆրանսիական համալսարանը, ստեղծվել է Եվրոպական ակադեմիան, Եվրոպական և Ֆրանսիական քոլեջը, ՀԱՊԿ-ի և ԵՏՄ ակադաեմիան, որ Դուք տեսնում եք, որ բարձրանում են: Այս մի քանի թվարակածս ուսումնական հաստատություններում աշխատում են 500-ից ավել դասախոսներ և ինտիլիգենցիայի ներկայացուցիչներ, մարդիկ կարողանում են ապահովել: Հայաստանի Հանարապետությունը ֆինանսական ներդրումներ չի կատարել, տրամադրվել են որոշակի շենքեր, որոնք լիովին վերակառուցվել և ընդլայնվել են, սա իրականացվել է արտաքին ներդրումների հաշվին և սրանք պետական սեփականություն են: ՀԱՊԿ ակադեմիան կարևորագույն ուսումնական հաստատություններից մեկը պետք է լինի Հայաստանում, որովհետև սա մեզ համար առաջնություն է տալիս: Բելառուսներն ուզում էին իրենց մոտ տանեին, Ղազաղները ուզում էին, նրանք ուզում էին, որպեսզի իրենց մոտ լինի այդ ակադեմիան, ասում էին՝ փողը կդնենք, շենքերն էլ կտանք: Բայց Արթուր Բաղդասարյանը իր կապերի շնորհիվ կարողացավ այդ ակադեմիան բերել Հայաստան, որը վերապատրաստելու է տարբեր երկրներից մասնագետներ և մեր երկրի երիտասարդներին կրթություն է տալու, ինչ է, սա վա՞տ բան է, սա միանշանակ շատ դրական է, և այս ուսումնական հաստատությունների շրջանավարտները, ես կարծում եմ շատերը գիտեն, այդ թվում նաև՝ Գևորգը, որը աշխատել է Եվրոպական համալսարանում, որ սրանք առավել արդիական ԲՈւՀեր են, որտեղ ո՛չ կաշառք կա, ո՛չ անգրագիտություն, որտեղ երեխաները ավարտելուց հետո, անմիջապես կարող են տեղավորվել աշխատանքի: Շա՞տ բան կա Հայաստանում էդպես արած:

Գևորգ Մելիքյան

Ցավոք, մեր եթերաժամանակը մոտենում է ավարտին, անենք փակումը, այսպես ասած: Պարոն Նորիկյան, խնդրեմ:

Նորայր Նորիկյան

Ես, ընդանհրապես հաշվի առնելով պատասխանատվության պահը, ես ուղղակի մեր քաղաքացիներին կհորդորեմ ապրիլի 2-ին ընտրել հանուն Հայաստանի վաղվա օրվա, իսկ վաղվա օրը արժանապատվորեն ապրելու համար անհրաժեշտ է, որ մեր քաղաքացիները տուրք չտան որևէ իրավախախտման, որևէ ապօրինության, որևէ հակաօրինական գործողության, այդ թվում նաև, որի առանցքում կարող է գտնվել ընտրակաշառք երևույթը: Ես ուղղակի կխնդրեի մեր հասարակությանը, որ ապրիլի 2-ին գիտակցաբար կատարեն իրենց քաղաքացիական պարտքը՝ընտրելով օրինական ձևով Հայաստանի վաղվա իշխանությանը:

Գևորգ Մելիքյան

Ես թերևս ավելացնելու բան չունեմ, պարո՛ն Շահգելդյան, մի երկու բառով:

Մհեր Շահգելդյան

Միանշանակ կողմնակից եմ գործընկերոջս մոտեցումներին, ավելին՝ ևս մեկ անգամ կուզեմ հուշել և՛ որպես ՀՎԿ փոխնագահ, և՛ որպես քաղաքական գործիչ, կոչ եմ անում մեր քաղաքացիներին ընտրել այն քաղաքական ուժերին, որոնք իսկապես փոփոխությունների են բերելու, որոնք իսկապես ներկայացնում են ժողովրդին, որոնք իսկապես փորձելու են արմատական փոփոխություններ անել, որտեղ իսկապես չկան օլիգարխներ, քանի որ կան կուսակցություններ, որտեղ օլիգարխիզացիայի գործընթացը, ցավոք սրտի, մեծ արագությամբ ընդլայնվում է և սրանք տարբեր ճյուղեր են ուղղակի, մեկ ընդհանուր մարմին, տարբեր կուսակցություններում, և իսկապես ընտրությունը կատարել խղճի մտոք, ընտրությունը կատարել մտքով և սրտով: Միայն սրտով դժվար է լինելու, միայն մտքով չի ստացվելու, այսինքն միտքը և սիրտը, արժեքները և գիտելիքները: Տեսեք՝ մարդիկ ինչ են առաջարկում և ինչ կարող են անել:

Գևորգ Մելիքյան

Շնորհակալություն շատ բոլորին զանգերի համար: Ես ուզում եմ ասել, որ մենք, իհարկե, կշարունակենք հետընտրական գործընթացներին անդրադառնալ և շարունակելու ենք մեր թեման, մենք այսպիսով ավարտում ենք այս քննարկումների շարքը, որը մենք իրականացրեցինք Շվեյցարիայի Համադաշնության կառավարության և «Դեպոպ» կառավարման ինստիտուտի հետ համատեղ, որպեսզի աջակցենք Հայաստանում արդար և թափանցիկ ընտրությունների անցկացմանը, ընտրություններին քաղաքացիների գիտակցված մասնակցությանը, ինչպես նաև՝ նպաստել Հայաստանում քաղաքացիական գիտակցության զարգացմանը, հնարավոր բոլոր միջոցներով, Հանրային ռադիոյի հետ միասին: Շնորհակալություն բոլորին, շնորհակալություն բոլոր զանգահարողներին, ես հիշեցնեմ, որ մենք հյուրընկալեցինք փաստաբան Նորայր Նորիկյանին, պարո՛ն Նորիկյան, շնորհակալություն Ձեզ, և «Հայկական վերածնունդ» կուսակցության պատգամավորության թեկնածու Մհեր Շահգելդյանին, պարո՛ն Շահգելդյան, շնորհակալություն Ձեզ ևս: Ձեզ հետ քաղաքագետ Գևորգ Մելիքյանն էր, մնացեք մեզ հետ և հետևեք մեր աշխատանքներին, առայժմ:

 

Leave a comment